Marwada Madaxweynaha Dalka ayaa Deeq Lacag ah oo ay soo dhiibeen Jaaliyada Soomaaliyeed Ee Dalka Denmarka Ku Wareejisay Guddoomiyaha Gobolka Shabeelaha Dhexe, iyadoo deeqdaasi lacagta ah wax looga qaban doono Fatahaada Webiga Shabeele uu geysto.
Guddoomiyaha gobolka Shabeelaha Dhexe Cali Guudlaawe Xuseen oo isna la wareegida deeqda kaddib la hadlay Warbaahinta Qaranka ayaa u mahadceliyay Jaaliyadda Soomaaliyeed ee isku xilqaamay Caawinta Walaalahooda Soomaaliyeed, isagoo sheegay in Jaaliyadani ay tahay midii ugu horeysay ee Caawisa dadka saameynta ay ku yeeshaan fatahaada, Waxaana uu sheegay in ka maamul ahaan ay sameeyeen ka hortag maamul oo la xiriira yareynta saameynta fatahaada oo lagu guuleystay.
Guddoomiye Guudlaawe ayaa u mahadceliyay Marwada Madaxweynaha Dalka sida mar walbo ay u garab taagantahay islamarkaana ay u caawineyso dadka taagta daran, waxaana uu ugu baaqay dadka Soomaaliyeed gaar ahaan Jaaliyadda Soomaaliyeed ee ka soo jeeda Gobolka Shabeelaha Dhexe in ay ka shaqeeyaan horumarinta iyo dib u dhiska Gobolka.
Marwada Madaxweynaha Dalka Sahra Cumar Xasan Oo deeqdaasi lacagta ah ku wareejisay guddoomiyaha gobolka Shabeelaha Dhaxe Cali Guudlaawe Xuseen ayaa u mahadcelisay Jaaliyadda Soomaaliyeed ee Denmarka ee gartay in ay caawiyaan walaalahooda Soomaaliyeed ee wehelka u noqday in Saameyn ay ku yeeshaan Fatahaada inta badan uu sameeyo Webiga Shabeele, waxaana ay soo hadal qaaday dadka Qaxootiga ku Ah South Africa, Kenya, iyo Yemen oo ay dhibaato heystaan oo ay xustay in loo baahan yahay in dadka Soomaaliyeed ay caawiyaan dadkaasi islamarkaana ay si damiir leh kaga jawaabaan.
