Allaha u naxariistee waxaa maanta magaalada Muqdisho ku geeriyooday Muuse Nuur Amiin oo xilal kala duwan ka soo qabtay dowladda Soomaaliya, iyadoo Xildhibaanno ka tirsan baarlamaanka ay ka tacsiyadeeyeen geerida Marxuumka.
Xildhibaan Daahir Amiin Jeesoow oo la hadlay Radio Muqdisho ayaa ugu horeyn tacsi u diray ehelada iyo asaxaabta uu ka geeriyooday Muuse Nuur Amiin oo saaka ku geeriyooday isbitaalka Recep Tayyip Erdoğan ee magaalada Muqdisho.
“Innaa Lillaahi Waa Innaa Illeyhi Raajicuun, Muuse Nuur Amiin waxa uu saaka salaaddi Subax ku geeriyooday isbitaalka Digfeer oo dhawaan loogu magacdaray Recep Tayyip Erdoğan, bilihii la soo dhaafay wuu xanuunsanayay, inkasta oo isbuucaan uu darsaday, marka Ummadda ayaan uga tacsideyneynaa geerida Marxuumka” ayuu yiri Xildhibaan Jeesoow.
Xildhibaanka ayaa intaa ku daray “Marxuumka waxa uu soo qabtay xilal kala duwan, sida Wasiirkii hore ee Arrimaha gudaha, Xildhibaan hore iyo xilal kale oo uu ka soo qabtay dowladdii dhexe”.
