Deegaanka Bandarqaali oo ahaa sanadihii u danbeeyay deegaan si weyn looga dareemayay horumaro dhinacyo badan isla markaana intooda badan ah kuwa ay ku gaareen bulshada iyo maamulka deegaankaasi isku tashi iyo wadashaqeyn ayaa waxaa maaanta halkaasi kormeer ku tagay mas’uuliyiin ka tirsan kuwa Gobalka Mudug siyaasiyiin horay xilal kala duwan uga soo qabtay Maamulkii hore ee Galmudug iyo xubno ka tirsan Guddiga dib-u-heshiisiinta bulshada Gobalka Mudug, kuwaas oo si weyn ay halkaa uga soo dhaweeyeen bulshada deegaanka sidoo kalana uga qeyb galay dhagax dhiga mashaariic ay bulshada iyo maamulka deegaankaasi ku hormarinayaan qaar ka mida adeegyada bulshada sida dhismaha iyo dayactirka wadooyinka sameynta jardiinooyin qeyb ka ah sare u qaadista bilicda.
Guddoomiyaha deegaanka Bandarqaali Sheekh Muxyadiin Axmed Garre ayaa ugu horeyn ka warbixiyay dadaalada ay wadaan iyo waxyaabihii ugu qabsoomay isku tashigooda iyo adeegyada ay u baahan yihiin in laga caawiyo, isla markaana lagama maarmaanka u ah nolasha bulshada, waxaana uu sheegay in deegaanka Bandarqaali bulshada ku nool ay u istaageen ka shaqeynta horumarka deegaankooda, iyagoo cid kale ku tashanayn taasna ay usuurta galisay in xiligaani Bandarqaali ay ka jiraan adeegyada aas aaska u ah nolasha bulshada, marka laga reebo dhanka caafimaadka oo uu tilmaamay in uu yahay mid baahidooda aan kaafin karin ayna ka codsanayaan maamulka Galmudug in laga caawiyo.
Guddoomiyaha Guddiga dib u heshiisiinta bulshada Gobalka Mudug Suldaan Cabdinaasir Jaamac Seed ayaa ku booriyay in ay sii laba jibaaraan isku duubnidooda, sidoo kalana nabadu ay fure u tahay gaarista horumarka.
Kulanka oo ay ka hadleen masuuliyiin iyo waxgarad ayaa waxaa gunaanadkii ka hadlay Guddoomiye ku xigeenka Maamulka Gobalka Mudug Axmed Maxamed Shire Qoodaar iyo Madaxweynihii hore ee Galmudug Maxamed Axmed Caalin waxayna wax lagu farxo ku tilmaameen sida bulshada deegaanka Bandarqaali ay isugu tashadeen una istaageen horumarinta deegaankooda, iyagoo balan qaaday in ay ku dadaali doonaan sidii looga caawin lahaa adeegyada u dhiman.
Cabdirisaaq Maxamed Axmed Gaalkacyo
