Shir wadatashi oo looga hadlayo mashruuc la xiriiro ka soo kabashada xasaradaha Soomaaliya ayaa maanta ka furmay magaalada Kismaayo ee xarunta KMG ah maamulka Jubbaland.
Shirkan oo ay soo qaban qaabiyeen Wasaaradaha Maaliyadda iyo Qorsheynta Xukuumadda Federaalka Soomaaliya ayaa waxaa xoogga lagu saarayaa sidii wax looga qaban lahaa Abaaraha, Fatahaadaha, Ayaxa iyo cudurka COVID-19, waxaana Dowladda Soomaaliya ka taageeraya Bankiga Adduunka.
Mas’uuliyiin ka socday Wasaaradda Qorsheynta Dowlad Goboleedka Jubbaland, Agaasime Waaxeedyada iyo shaqaalaha ayaa goob joog ka ahaa shirka, kuwaas oo aragtidooda ka dhiibanayay shirka intii uu socday
Agaasimaha Wasaaradda Qorsheynta Maamulka Jubbaland Cabdiwaaxid Maxamed Dhaqane oo furitaanka shirka hadal kooban ka jeediyay ayaa sheegay in shirkan dib loogu eegayo waxyaabihii kaabayaasha dhaqaalaha ee ku waxyeelobay dhibaatooyinkii la soo maray ee ay ka mid ahaayeen daadadka, Abaaraha, Ayaxa iyo cudurka Covid-19 oo halakeeyay dunida intiisa kale.
Asad Yuusuf Qanyare oo ah madaxa xiriirka deeq-bixiyeyaasha ee Wasaaradda Qorsheynta Xukuumadda Federaalka ayaa sheegay inuu shirka ujeedkiisu uu yahay sidii looga hortegi lahaa xasaradaha soo noq noqday ee Abaaraha, dadaadka, Ayaxa iyo Cudurka COVID-19.
Diyaarinta mashruucan Waxaa lagala tashaday Wasaaradaha ay quseeyso heer Fedaraal iyo heer dawlad goboleed.
Wasaaradaha Maaliyadda iyo Qorsheynta heer federaal waxa ay in muddo ah ka shaqeeynayeen qaabdhismeedka lagu hirgelinaayo mashruuca iyo shaqaaleynsiinta howl-wadeenada Mashruucan;
Waxaa jiray shuruudo adag oo uu Baanka Aduunku ku xiran Maalgelinta mashruucan oo ay lagama maarmaan tahay in lafuliyo si loo soo deeyo lacagaha. Waxaa ka mid ah diyaarinta dokumeentiga mashruuca, sharciga, heshiiska maalgelinta iyo diyaarinta howlwadeenada laf dhabarka u ah mashruuca.
Qaab dhismeedka maamulka mashruucu waxa uu ka kooban yahay saddex heer oo kala ah;
– Guddiga Hoggaaminta mashruuca (PSC)
– Unugga Fulinta Mashruuca (PIU)
– Hawl-wadeenada maamulka mashruuca ee heer dowlad goboleedka. (SPT).
Ujeedada wadatashiga ayaa ah mudnaansiinta baahiyaha u Adkeysiga iyo soo kabashada ee Dawlad Goboleedka Koonfur Galbeed Soomaali. Baahiyahan oo wadanka idil horay looga soo uruuriyay ayaa la doonayaa in lagaso xulo kuwooda hor-tabinta leh.
Waxa aan rajanaynaa waxa kasoo baxa wada-tashigan in ay noqdaan xal wax ka tara masiibooyinkan soo noqnoqday.
Aadan Maxamed Salaad (Aadan Kismaayo)
