Mas’uuliyiin ka tirsan Dowladda Goboleedka Galmudug ayaa magaalada Galkacyo ku qabtay kulan ballaaran oo mahadcelin iyo dhiirrigelin ah, kaas oo loo sameeyay ardaydii sanadkan ku guuleysatay tartanka Qur’aanka Kariimka ee heer Dowlad Goboleed. Kulankan ayaa ahaa mid lagu bogaadinayay dadaalka iyo kartida ay muujiyeen ardayda, isla markaana lagu xoojinayay barashada iyo ku dhaqanka Kitaabka Alle.
Mas’uuliyiintii ka hadlay munaasabadda ayaa hambalyo iyo ammaan u jeediyay ardayda ku guuleysatay tartanka, iyagoo ku dhiirrigeliyay inay sii wadaan dadaalka iyo horumarinta aqoontooda diineed. Sidoo kale, waxay u mahadceliyeen waalidiinta iyo macallimiinta kaalinta weyn ka qaatay tarbiyadda iyo tababarka ardayda.
Intii uu socday kulanka, waxaa la guddoonsiiyay ardayda abaalmarinno iyo shahaadooyin muujinaya guusha ay gaareen. Mas’uuliyiintu waxay tilmaameen in Dowladda Galmudug ay sii wadi doonto taageerada tartamada noocan oo kale ah, si loo dhiirrigeliyo jiilka soo koraya loona kobciyo barashada Qur’aanka Kariimka ee bulshada dhexdeeda.
