Kulankan oo ay soo agaasintay Hay’adda Batroolka Qaranka, isla markaana ahaa mid bulshada loogu soo gudbinayay heerarkii kala duwanaa ee ay soo martay arimaha shidaal baarista Soomaaliya iyo halka ay haatan mareeyso ayaa waxaa ka qeyb galay Masuuliyiin ka socatay xubno ka tirsan Golaha Wasiirada iyo Baarlamaanka Dowlad Gobaleedka Galmudug Odayaasha dhaqanka Iyo Ganacsato.
Ugu horeyn kulanka waxaa ka hadlay Guddoomiyaha Hay’adda Batroolka Qaranka injineer Cabdulqaadir Maxamuud Aadan waxa uuna sharaxaad dheer ka bixiyay heerarkii kala duwanaa ee ay soo martay arinta Shidaal Baarista Soomaaliya iyo heerka haatan ay mareeyso, isagoo dhinaca kalana bulshada la wadaagay ahmiyada iyo Faa’iidada Soomaaliya ay u yeelaneyso haddii lagu guuleysto Qodista Ceelasha haatan Sahankoodu guuleeystay iyo kuwa hadda kadib ay socdaan qorshahooda Sahminta.
Related posts
Guddoomiye Cabdulqaadir ayaa sheegay in ujeedka socdaalkoodu uu yahay labo arimood oo kala ah ka warbixinta halka ay haatan ay wax marayaan iyo wacyi galin loo sameeynayo Bulshada taas oo ku aadan ka faa’iideeysiga fursadaha shaqo ee imaanaya
Duqa degmada Gaalkacyo Cabdiraxmaan Sheekh Xasan ayaa uga mahadceliyay Hay’adda Batroolka Qaranka xogta ay bulshada reer Gaalkacyo ka siiyeen halka ay marayaan dadaallada Baarista Shidaalka iyo miro dhalka ka muuqanaya, isagoo dhanka kalena sheegay in loo baahan yahay ka shaqeeynta Amniga
Guddoomiye ku-xigeenka Gobalka Mudug Badal Sheekh Liibaan oo isna ka hadlay kulanka ayaa sheegay in ka maamul ahaan ay bogaadinayaan mira dhalka ka muuqda sahankii shidaalka iyo heerarkii kala duwanaa ee ay soo martay.
Kulanka oo intii uu socday ay ka hadleen xubno ka socday odayaasha dhaqanka ayaa waxaa gabagabadii ka hadlay Xildhibaan Yoonis Maxamed Shaare iyo Wasiirka Wasaaradda Waxbarashada Galmudug Maxamed Xaashi Dhoore oo sheegay in warbixinta ay usoo gudbiyeen Madaxda Hay’adda Batroolka Qaranka ay si weyn ugu qanceen ayna tahay mid muujineeysa guusha Soomaaliya gaartay balse loo.baahan yahay in la.garab istaago dadaallada Dowladda Federaalka Soomaaliya.
