Wasiirka Wasaaradda Arrimaha Gudaha, Federaalka iyo Dib U Heshiisiinta mudane Cali Yuusuf Cali (Xoosh) iyo mas’uuliyiin sare oo ka tirsan heerarka kala duwan ee dowladda Federaalka iyo Dowlad Goboleedka Koonfur Galbeed oo socdaal shaqo ku gaaray gobolka Shabeellada Hoose ayaa kulan is xog wareysi ah la qaatay Odeyaasha dhaqanka iyo qeybaha bulshada ee degmada Marka.
Kulankan dadweyne ayaa waxaa diiradda lagu saarayey sidii la isugu xiri lahaa maamulka degmada, cadaaladda iyo amniga loona adkeyn lahaa wada shaqeyntooda si ay bulshada uga haqabtiraan adeegyadda dowlanimda ay had iyo jeer u baahan tahay si looga guul gaaro dadaalada xasilnta. Waxaa kale oo diiradda la saaray adkaynta nabada iyo isla jirka bulshada si deegaanka loo gaar siiyo horumar waara oo waxtar leh.
Bulshada deegaanka ayaa Wasiirka Arrimaha Gudaha ee Soomaaliya Cali Xoosh uga waramay xaaladda degmada, iyaga oo sheegay oo Marka iyo deegaannada hoos yimaada ay amni buuxa heleen kadib markii laga xoreeyey Khawaarijta, sidoo kale waxaa ay intaa ku dareen in soo afjarmeen dagaal beeleedyo ay hurin jireen nabad-diidka.
“Heerarka kala duwan ee Dowladda, Federaalka iyo Dowlad goboleedyadaba waxaa ka go’an in ay dhageystaan shacabka qeybihiisa kala duwan si loo xaqiijiyo gaarsiinta adeegyada ay u baahan yihiin” Waxaa sii yiri Wasiir Xoosh
Booqashadani waxay qeyb ka tahay safaro shaqo oo uu wasiirku ku kala bixinayo dhammaan dowlad goboleedyada dalka si loo dhagaysto dadka ku nool deegaandaas kala gadisan oo ay dadaalada kala duwan ka socdaan si loo adkeeyo dowladnimada, korna loogu qaado kalsoonida dadku ay ku qabaan dowladnimada.
