Mas’uuliyiin ka tirsan Safaaradda Soomaaliya ee Uganda oo ka qayb galay Bandhig Dhaqameed ay soo bandhigeen arday Soomaaliyeed oo wax kabarata mid ka mid ah Jaamacaha Kampala.
Bandhig dhaqameedkan oo aay soo bandhigeen arday Soomaaliyeed ee wax ka barta Jaamacadda CIU ee ku taala Magaalada Kampala ee Dalka Uganda ayaa waxaa ka qayb galay mas’uuliyiin ka socotay Safaaradda Jamhuuriyadda Federaalka Soomaaliya ee Dalka Uganda.
Uqeybsanaha Waxbarashada iyo Dhaqanka Safaaradda Axmed Saciid Yuusuf iyo Uqeybsanaha Warfaafinta Safaaradda Soomaaliya ee Uganda Fiidow Maxamuud Fiidow ayaa ardayda kala qeyb galay bandhigaas iyagoo ku ammaanay qaabka fiican ay usoo bandhigeen dhaqankeena suubaan ee Soomaaliyeed.
Uqeybsanaha Waxbarashada Safaaradda Soomaaliya ee Uganda Axmed Saciid Yuusuf oo warbaahinta isla goobta bandhig dhaqameedka ardayda kusoo bandhigayeen kula hadlay ayaa ammaanay sida ardayda Soomaalida usoo bandhigeen Dhaqakeena.
Bandhig dhaqameedkan oo dhowr wadan ardaydooda soo bandhigayeen dhaqankooda oo kala ahaa Uganda, Koofurta Sudan, Soomaaliya, iyo wadamo kale, iyadoona bandhigii ardayda Soomaalida ay noqdeen ardaydii ugu wanaagsanaa ee dhaqankooda soo bandhiga.
Sidoo kale ardayda ayaa soo bandhigay cunooyinka sida gaarka ah u leeyihiin Soomaalida ee aadka u macaan, iyadoo madaxdii cunada Soomaalida dhadhamisay ay sheegeen inaay tahay cunada Soomaalida mid aad u macaan.
Maxamed Cabdillaahu Cabdi (Qarash) iyo Xamda Cawad Raabi oo ka mid ahaa ardaydii sida wayn uga soo shaqeysay bandhig dhaqameedkan oo la hadlay Warbaahinta Qaranka ayaa sheegay inay goobta ku soo bandhigeen wax yaabaha uu caanka ku yahay dhaqankeena suuban.
Ardayda Soomaalida ee jaamacaha dibadda wax ka barta ayaa inta badan kasoo dhex muuqada ardayda kale ee wax la bartaan, iyagoo soo bandhiga dhaqankeena suuban ee Soomaaliya.
