Wafdi ka koobnaa Wasiiro ka tirsan Xukuumadda Galmudug, Senatoro iyo Xildhibaannada laga soo doortay degaannada Galmudug, ganacsato iyo Mas’uuliyiin xilal kala duwan horey uga soo qabtay Soomaliya ayaa maanta gaaray magaalada Hobyo ee dhacda Cirifka Badweynta Hindiya.
Ujeedka safarkaan Wafdiga ayaa ahaa Daahfurka Dhismaha Dekadda Hobyo oo markaan ay ku taamayaan inay dhisaan shirkado Madani iyo Ajanabi ah oo shaqo wadaag ah.
Mashruucaan ayaa waxaa fulintiisa iska kaashan doono shirkadda Hobyo Port Development iyo shirkad laga leeyahay dalka Turkiga, ijineero ka socday ayaa qeýb ka ahaa wafdiga.
Ugu horeyntii qaar ka mid ah madaxda shirkadaha Baraarug iyo Hobyo Port Development ayaa ka warbixiyay mashruuca waxa uu kaga duwan yahay Mashaariicdii aan fulin ee laga dhagax dhigi jiray Hobyo.
Odoyaal iyo waxgarad ka hadlay Daahfurka mashruucaan ayaa sheegey inay tahay mid wax badan ku soo kordhin doonto bulshada magaalada.
Qaar ka mid ah Xildhibaannada iyo Senatorada laga soo doortay deegaannada Galmudug oo ka hadlay mashruucan ayaa sheegey inuu yahay mid wax tar u leh bulshada Galmudug.
Ugu Dambeyntii Wasiirka Ganacsiga Cabdikaafi Iyo Wasiirka Dekaddaha Galmudug Saabir Nuur Shuuriye ayaa sheegay in Galmudug ay doorkeeda qaadan doonto dhismaha dekaddaan.
