Maxkamada Ciidanka Qalabka Sida ayaa sheegtay in tallaabo adag ay ka qaadayso ciddii lagu helaa inay ka qeyb qaadatay dagaal beeleedyadii ka dhacay Gobolka Hiiraan, gaar ahaan ciidamada qalabka sida ee ku sugan gobolka.
Guddoomiyaha Maxkamadda darajada koowaad ee ciidanka qalabka sida Gaashaanle Dhexe Xasan Cali Nuur Shuute ayaa tilmaamay in maxkamadda ay sameyneyso baaritaanno dheeraad ah oo ku saabsan in ciidanka dowladda ay ku luglahaayeen dagaal beeleedyo ka dhacay qaar ka mid ah gobollada dalka, gaar ahaan tan Beledweyne.
โHorey waxaa jirtay dagaal beeleedyo ka dhacay qaar ka mid ah gobollada dalka, oo ciidanka dowladda lagu eedeeyay inay qeyb ku lahaayeen, balse baaritaannoo dheer kadib waxaa inoo soo baxday in arrintaasi aysan wax ka jirin, waxaan rabaa in aan markale ku celiyo haddii ay jirto ciidan xitaa si af ah uga qeyb qaatay dagaal beeleedyada in maxkamadda ciidanka qalabka sida ay tallaaabo ka qaadaysoโ.ayuu yiri Gaashaanle Dhexe Xasan Cali Nuur Shuute.
Guddoomiyaha Maxkamadda darajada koowaad ee ciidanka qalabka sida ayaa ugu baaqay dhallinyarada hubeysan ee aan ciidanka dowladda ka tirsaneyn ee ku sugan Beledweyne inay hubka soo wareejiyaan, isagoo ka digay in ciddi fulin weysa laga qaadi doono tallaabo sharciga waafaqsan.
โWaxaan rabnaa in aan fariin u dirno kooxaha maleeshiyaadka hubeysan ah ee aan ciidanka ka tirsaneyn, isla markaana hubkooda shacabka ku dhibaateynaya in maxkamadda tallaabo cad ka qaadi doonto, waxaana la rabaa inay iska soo diiwaan geliyaan xarunta Maxkamadda oo ay hubka soo wareejiyaan, ayna fuliyaan awaamiirtii ka soo baxday maamulka gobolka oo ahayd inay soo xaroodaanโ ayuu yiri Guddoomiyaha Maxkamadda.
