Mogadishu, 30 January 2015 – Midowga Afrika ayaa soo dhaweeyay magacaabista Golaha Wasiirada cusub ee uu ku dhawaaqay Raiisul wasaaraha Soomaaliya Mudane Cumar Cabdirashiid Cali Sharma’arke, kuwaasi oo saddex ka mid ah ay Dumar yihiin.
War-saxaafadeed ka soo baxay Xafiiska Wakiilka Gaarka ah ee Midowga Afrika u qaabilsan Soomaaliya ayaa lagu sheegay in ay soo dhaweynayaan golaha Wasiirada cusub ee Soomaaliya, isla markaana la xoojiyo hiigsiga cusub ee sanadka 2016-ka ee ay dowladda hiigsaneyso iyo ajandaha ku saabsan doorashada bisha September ee 2016-ka laga hirgelinayo guud ahaan dalka.
War-saxaafadeedka ayaa lagu yiri “ Si loo gaaro talaabooyinka ay hiigsaneyso dowladda, isla markaana looga fogaado waxkasta oo dib u dhac u keeni kara Xukuumadda, Midowga Afrika waxa uu ku boorinayaa hay’adaha dowladda gaar ahaan baarlamaanka Federaalka ah ee Soomaaliya in uu codka kalsoonida ah siiyo xukuumadda cusub ee Soomaaliya, si ay u dar dargeliyaan howlaha horyaalla oo ay ugu muhiimsanyiiin xoojinta xiriirka Soomaaliya ay la leedahay beesha caalamka iyo xasilinta goobaha laga xoreeyay maleesiyada Al-Shabaab”
“Midowga Afrika waxa uu sii wadayaa taageerada uu siinayo shacabka Soomaaliyeed, la shaqeynta hay’adaha dowladda, ka qeyb qaadashada xasilinta iyo dib u dhiska dalka” ayaa lagu soo gabo gabeeyay War-saxaafadeedka.
