Saraakiisha sare ee ciidamada Gabon ayaa saaka oo Arbaca ah ku dhawaaqay inay la wareegeen talada dalka, kadib markii guddiga doorashada dalkaasi ay ku dhawaaqeen in Madaxweyne Cali Bongo uu ku guuleystay markii seddexaad.
Militariga ayaa sidokale ku dhawaaqay inay xirayaan xuduudaha dalka ilaa amar dambe, lana kala dirayo hay’adaha dowliga ah, heegana la galiyay ciidamada difaaca ee Gabon.
Saraakiish Militariga Gabon, ayaa sheegay inay meesha ka sareen natiijada doorashadii dhawaan ka dhacday dalkaasi ee la sheegay inuu ku soo baxay Bongo.
Kooxdan oo ay ku jiraan in ka badan 10 sarkaal ayaa bayaankooda ku sheegay in ay ku hadlayaan magaca Guddiga KMG ah ee soo celinta hay’adaha dowladda.
Saraakiishan oo dhaleeceeyay hab maamulka doorashadii dhacday ayaa sheegay inay go’aansadeen in la difaaco nabadda iyo karaamada dalka lana soo afjaro nidaamka khaldan ee hadda dalka ka jira.
