Nuxurka Su’aallaha ay Mudaneyaasha Baarlamaanka weeydiiyeen Wasiirka Wasaaradda Waxbarashada iyo Tacliinta sare ayaa kala ahaa Sharciyada iyo siyaasadda Waxbarashada Qaranka, wadashaqeynta Wasaaradda iyo daladaha Waxbarashada Dalka, in si siman ardayda Soomaaliyeed xaquuq u helaan luuqada ay doonaanba wax haku bartaane, qorshaha Wasaaradda ee Jaamacadaha tirada badan ee dalka ka jira, si la mid ah sidii shalayna Xuldhibaannadu waxey ku cel celiyeen waxa ay Wasaaraddu u heyso Ardayda aanan gelin imtixaankii mideysnaa iyo hirgelinta manhaj waxbarasho oo mideysan.
Wasiirka Wasaaradda Waxbarashada iyo Tacliinta Sare ee Dowladda Soomaaliya Khadro Bashiir Cali oo Xildhibaannada Baarlamaanka uga jawaabay su’aallaha ay weeydiiyeen ayaa si gaar ah Xildhibaannada ugu faah faahisay qorshaha Wasaaradda Waxbarashada ee sameynta manhaj waxbarasho oo ay ku mideysan tahay Soomaali oo idil iyo sameynta sharciga iyo siyaasadda Waxbarashada Qaranka.
Ku simaha Guddoomiyaha Baarlamaanka ahna Guddoomiye ku xigeenka Koobaad ee Golaha Shacabka Mudane Jeeylaani Nuur Iikar oo gebagebadii kulanka ka hadlay ayaa tilmaamay iney soo gebageboobeen Su’aallaha Xildhibaannada ay weeydiinayeen Wasiirka Wasaaradda Waxbarashada waxaana uu dhanka kale ka hadlay mooshin ay Xildhibaanno ka tirsan Baarlamaanka ka keeneen wax ka bedel lagu sameynayo Sharciga Isgaarsiinta Qaranka.
Maalinnimada arbacada ah ee soo socota haduu Alle idmo ayaa qorshuhu yahay in Xildhibaannada Baarlamaanku sii amba qaadaan ka doodista Hindise Sharciyeedka Xeerka Isgaarsiinta Qaranka kaasi oo Xildhibaannadu ay bilaabeen maalinnimadii sabtiga aheyd ee todobaadkan.
