Ra’iisul Wasaare ku-xigeenka Xukuumadda Federaalka Soomaaliya Mudane Maxamed Cumar Carteh oo shalay ku guuleystay kursiga 1aad ee Xildhibaanada Somaliland isaga oo helay 47 cod ayaa balan qaaday in uu kor u qaadi doono sharafta iyo karaamada Ummadda Soomaaliyeed, meelkasta oo a joogaan.
Mudane Maxamed Cumar Carteh oo qudbad xamaasad leh ka jeediyay goobta ayaa u ballanqaaday ergada iyo dadka Soomaaliyeed in masuuliyadda la saaray uu si hufnaan leh u gudan doono.
“Allaahu Akbar, Allaahu Akbar, Allaahu Akbar; Illaah baa baxsha darjada kana qaada cidda uu doono. Waxaan u mahadcelinayaa dhamaan ergada ii doortay inaan magacooda ku matelo golaha shacabka, waxa aan u ballanqaadayaa inaan sharaftooda kor u qaado kana shaqeeyo danaha dadka Soomaaliyeed”.
Ra’iisul Wasaare ku-Xigeenka ayaa dhanka kale sheegay in dadka Soomaaliyeed u baahanyihiin nabad iyo horumar islamarkaana uu ka shaqeeyn doono.
“Dadka Soomaaliyeed waxa ay mudan yihiin una baahan yihiin dal nabdoon oo barwaaqo ah; waa taa balanta aan ku shaqeyn doono intii karaankeyga ah”.
Mudane Carteh ayaa ugu dambeyn bogaadiyay guddiyada doorashooyinka ee heer Federaal iyo heer Gobol islamarkaana mahadcelin ballaaran u jeediyay ciidamada amniga oo si sharafleh u gutay hawshii qaran ee ay u xil saarnaayeen.
—–DHAMAAD—–
