Wasiir Dowlaha Wasaaradda Arrimaha Gudaha, Federaalka iyo Dib u heshiisiinta Mudane Saadaad Maxamed Nuur Caliyow oo maanta daah furay Kulanka Ansixinta Hindise Sharciyeedka Machadka Qaran ee Dowladaha Hoose, ayaa ka hadlay sida ay muhiim u tahay Ansixinta Hindise Sharciyeedka Machadka Qaran ee Dowladaha Hoose.
Mudane Saadaad oo arrinkaasi ka hadalaya ayaa waxaa uu yiri “Fursadani waxaan rabnaa in dadka naga dambeeya ay naga dhaxlaan wax la taaban karo, oo ay ugu horeeyaan soo saaridda kaadiriin”.
“Machadkan waxaa uu qeyb ka qaadan doonaa in la daadejiyo dowladnimada, oo la fahamsiiyo howlaha federaalka iyo nidaamka dowladnida” ayuu intaasi ku daray Wasii Dowlaha Wasaaradda mudane Saadaad Maxamed.
Awoodda Machadka mar uu ka hadalayey Wasiir Dowlaha Wasaaradda Arrimaha gudaha, Federaalka iyo Dib u heshiisiinta mudane Saadaad Maxamed Nuur Caliyow ayaa waxaa ka yiri “ Hindise Sharciyeedka ujeedkiisu waa In la helo Machad gaar u ah dowladda hoose, oo ku dhisan hannaaka federaalka, Machadku waa inuu laamo ku yeesho dowladaha xubnaha ka ah dowladda federaalka ah, waxaana hadda diyaar ah siyaasado iyo manhaj, maantana waxaa idiin horyaallaa inaad anxisiyaan si loogu gudbiyo hey’adaha ay khuseyso”.
“Wasaaradda Arrimaha Gudaha, Federaalka iyo Dib u heshiisiinta waxaa ka go’an hirgelinta Machadka dowladaha hoose, oo tayo leh, kuna shaqeeya nidaam federaal ah” ayuu hadalkiisa kusoo gabagabeeyay mudane Saadaad Maxamed Nuur Caliyow, Wasiir Dowlaha Wasaaradda Arrimaha Gudaha, Federaalka iyo Dib u heshiisiinta.
