Munaasabadan lagu maamuusayay Sanad guuradii koowaad ee kasoo wareegatay markii la howl galiyay Ciidanka Xasilinta Booliiska Gobalka Mudug oo ay ka qeyb galeen Masuuliyiin iyo Saraakiil ka tirsan dowlad Gobaleedyada Galmudug iyo Puntland ayaa maanta lagu qabtay magaalada Gaalkacyo ee xarunta Gobalka mudug.
Munaasabada oo si weyn looga hadlay waxqabadka Ciidanka Xasilinta Gobalka Mudug iyo Baahiyada jira ayaa Taliyaha Ciidanka Xasilinta ee Gobalka Mudug G/sare Jaamac Maxamed Axmed wuxuu sheegay in mudadii ay shaqeynayeen ay wax weyn ka qabteen amniga iyo nabad galyada Gobalka, lana sii dardar galin doono howlaha Amniga.
Taliyaha qeybta Booliiska Gobalka Mudug ee Puntland G/sare Axmed Cismaan Cali oo isna ka hadlay Munaasabada ayaa uga mahad celiyay ciidanka Xasilinta waxqabadka muuqda asagoona kula dar daarmay in ay sii laba jibaaraan.
Duqa degmada Gaalkacyo ee Galmudug Xirsi Yuusuf Barre oo ku hadlayay magaca Masuuliyiinta Maamulka Degmada ee Labada Maamul ayaa ku booriyay Ciidanka Xasilinta in ay u adkeystaan baahiyada jira isagoona uga mahad celiyay howsha adag ee ay u hayaan bulshadooda.
