Siminaar aqoon kororsi ah ayaa maanta Muqdisho uga furmay in ka badan 30 shaqaale oo ka tirsan hay’adaha dowladda, kaasi oo ku saabsan sidii ay uga qeyb qaadan lahaayeen horumarinta mashaariicda dalka ka socda.
Siminaarkan oo socon doono muddo labo cisho ah, isla markaana loo qabtay qaar ka mid ah shaqalaha hay’adaha dowladda oo ay soo qaban qaabisay Hay’adda Xiriirka Qiimeynta ee Horumarka Soomaaliya ayaa inta uu socda waxa ay ku baran doonaan dabagalka mashaariicda u baahan in dalka laga hirgeliyo, inay noqdaan kuwa ka fekera sidii dalka looga hirgelin lahaa mashaariic iyo Arrimo kale, iyadoo siminaarka ay casharo ka bixin doonaan macalimiin qibrad u leh howlahan.
Madaxa Hay’adda Xiriirka Qiimeynta ee Horumarka Soomaaliya Axmed Muqtaar ayaa tilmaamay in siminaarkan uu yahay mid lagu tayaynayo aqoonta shaqaalaha dowladda, isla markaana ay u noqon lahaayeen kuwa ka shaqeeya horumarka dalka, hay’aduna ay u taagantay kobcinta aqoonta shaqaalaha.
Axmed Muqtaar ayaa xusay in ujeedka laga leeyahay siminaarka uu yahay in lagu soo saaro shaqaale u tababaran sidii ay noqon lahaayeen kuwa ka fekera mashaariicda muhiimka u ah bulshada ee laga hirgelinayo dalka.
Qaar ka mid ah shaqaalaha tababarka ka qeyb galay ayaa mas’uuliyiinta hay’adda uga mahadceliyay qabsoomidda siminaarkan, iyagoo xusay inay diyaar u yihiin sidii bulshada inteeda kale ugu faa’iideyn lahaayeen waxyaabaha ay ka bartaan siminaarka.
Aqoon kororsiga nuucaani oo kale ah ayaa qeyb ka ah qorsheyaasha lagu kobcinayo aqoonta shaqaalaha dowladda, si ay u noqdaan kuwa ay ka yimaadaan mashaariicda ay bulshada u baahi qabaan in dalka laga hirgeliyo.
