Munaasabadda lagu daah furayay Ururkan ka shaqeenaya Saaxiibtinimada Soomaaliya iyo Shiinaha waxaa ka qeybgalay Wasiiro,xildhibaano,taliyaha Ciidanka Booliska Soomaaliyeed,Danjiraha Shinaha u qaabilsan Soomaaliya iyo marti sharaf kale.
Xubnaha ka qeybgalay waxaa kamid ahaa Wasiir kuxigeenbka Waxbarashada Faysal Cumar Guuleed,Wasiir kuxigeenka Gaashaandhigga C/laahi Colaad Rooble,Senator Cabdi Xasan Cawaale Qeybdiid iyo C/llaahi Sheekh Ismaaciil Fartaag,kuwaasi oo dhamantoodi ammaanay dowrka dowladda Shiinaha ay ka qaadatay arrimaha Soomaaliya gaar ahaan taageerada dhinacyada dib u dhiska,dhaqaalaha iyo arrimaha bani,aadanimada.
C/llaahi C/qaadir Xaashi oo ah guddoomiyaha ururka Saaxxibtinimada Soomaaliya iyo Shiinaha oo ah dhalinyaro wax ku soo baratay dalka Shiinaha ayaa sheegay in ay ka go’antay sidii aqoontii ay soo barteen dib ugu celin lahaayeen dalkooda hooyo,ayna ka shaqeyndoonaan dhiirogelinta xiriirka labada dal.
Qin Jian oo ah Danjirah Shiinaha ee Soomaaliya ayaa balanqaaday in ka dowlad ahaan ay si dhab ah u garab istaagi doonan Soomaaliya,ayna iska kaashan doonaan dhinacyada horumarinta kaabayaasha dhaqaalaha ee labada dal.
Mudane Faysal Cumar Guuleed oo ah wasiir kuxigeenka waxbarashada Xukuumadda Soomaaliya ayaa soo dhaweyeey talaabadan lagu aas aasey ururkan,oo uu ku tilmaamay mid muhiimad gaar ah leh.
“Xiriirka ka dhexeeya Soomaaliya iyo Shiinaha waa mid taariikhi ah,waxaa uu ahaa xiriir soo jireen ah,waxaan Shiinaha iskakaashanaa waxyaabo badan oo ay waxbarashadu ka mid tahay,waxaan rabnaa hadda in fursadaha waxbarasho ee dibadda ah loo bedelo in Shiinaha uu ka qeyb qaato tayeynta waxbarashada Soomaaliya”. Ayuu yiri Wasiir Faysal Cumar Guuleed.
Dowladda Shiinaha ayaa dalka Soomaaliya waxay ka hirgelisay mashaariic horumarineed oo kaladuwan laga soo bilaabo xiligii xoriyadda ee Soomaaliya ilaa haatan oo xiriir qoto dheer uu kala dhexeeyay Soomaaliya.
