Musharax Ibraahim Xabeeb Nuur oo isu soo sharaxay xilka madaxweynaha maamulka gobolada Hiiraan iyo Shabeelaha dhaxe ayaa maanta gaaray Magaalada Baledweyne ee Xarunta Gobolka Hiiraaan, waxaana garoonka diyaaradaha Ugaas Khaliif ku soo dhaweeyay xubna ka mid ah maamulka Gobolka Hiiraan, Ururka dhalinyarda, odayaal,Waxgarad iyo dadweyne ka kala yimid xaafadaha Magaalada Beledweyne..
Soo dhaweyn kaddib musharaxa madaxweynaha labada gobol Ex Xildhibaan Ibraahim Xabeeb Nuur iyo xubnihii la socday oo loo galbiyay gudaha magaalada ayaa xarunta maamulka Gobolka kulan kula qaatay Guddoomiyaha Gobolka Hiiraan Yuusuf Axmed Hagar Yuusuf Dabageed.
Ex-Xildhibaan Ibraahim Xabeeb Nuur oo intaasi kadib la hadlay warbaahinta ayaa ugu horeyn u mahadceliyay dadkii soo dhaweyay waxaana uu shegay musharaxa inuu u taagan yahay qabashada xilka madaxtinimo ee Maamulka Hiiraan iyo shabelaha Dhexe loo sameynayo dhawaan.
‘’Waxa farxad ii ah inaan soo gaaro Baledweyne oo ah halkii aan ku dhashay sidaad ogtihiin waxa u taaganahay ama aan musharax u ahay Jagada madaxweynenimo ee maamulka loo dhisayo Gobolada Hiiraan iyo Sh/dhexe waxana rajeynayaa inaan ku geleysta xilkaasi sidaasi waxa yiri musharax ibraahim xabeeb nuur.
Siyaasi Ibraahim Xabeeb Nuur ayaa noqonaya musharaxii labaad ee isku soo taago xilka madaxweynenimo ee Maamul Goboledka Hiiraan iyo Shabeelaha dhexe islamarkaana gaara Magaalaada B/weyne ee xarunta Gobolka Hiiraan.
Si kastaba ha ahaatee, Ibraahim Xabeeb Nuur ayaa waxayaabaha lagu xusuusto waxaa ka mid ah; ka mid noqoshada xildhibaanadii dowladdii KMG-ka ahayd; isagoo xubin ka ahaa Xidlhibaannada Baarlamaanka Afrika (PAN AFRICAN), isagoo sidoo kale wasiir kasoo noqday dowladdii hore, isla markaana ah siyaasi waqti badan kusoo jiray siyaasadda dalka. Waana Sarkaal aqoon durugsan u leh arrimaha ciidanka oo uu ka gaaray Darajada Korneyl ka tirsanaa Ciidamada Xoogga dalka Soomaaliya xilligii ay jirtay Dowladdii Kacaanka.
Xigasho Sawirada Radio Hiranwey B/weyne
