Allaha u naxariistee waxaa goor dhow ku geeriyooday magaalada Dubai Musikiiste Maxamed Weli Xasan oo ka mid ahaa hobalada Fanaaniinta Qaranka Waaberi oo u qaabilsanaa dhanka muusikada oo uu caan ku ahaa, iyadoo si lama filaan ah uu wadnaha u istaagay xili uu ku guda jiray safar Shaqo oo uu maanta ugu baxay Dalka Kuwait Sida warbaahinta Qaranka uu u xaqiijiyay Maareeye Ku xigeenka Hobalada Waaberi Maxamed Xasan Barow.
Allaha u naxariistee Marxuumka ayaa si kadis ah wadnaha u istaagay isagoo saaran diyaaradii uu saarnaa oo ku wajahneyd Magaalada Dubai ee dalka Isu taga imaaraadka Carabka u geeriyooday mana jirin xanuun hayay waayadaan.
Geerida allaha u naxariistee Musikiiste Maxamed Weli Xasan Ayaa waxaa ka tacsiyeeyay Mas’uuliyiinta wasaaradda Warfaafinta oo uu ugu horeeyo sii hayahay wasiirka wasaaradda Warfaafinta Mustafe Sheekh Cali Dhuxulow, Wasiirka Cusub ee wasaaradda Warfaafinta, Maxamed Cabdi Xayir Maareeyee, Wasiir ku xigeenka, iyo wasiiru dowlaha wasaaradaasi, Agaasimaha Guud ee wasaaradda Warfaafinta Agaasimayaasha Warbaahinta Qaranka iyo Radio Muqdisho iyo dhamaan Shaqaalaha wasaaradda Warfaafinta ayaa ugu tacsiyeeyay Sawir qaade C/qaadir Maxamed Xasan Timoos iyo eheladiisa oo ka mid ah shaqaalaha wasaaradda islamarkaana aabihiisa ah Allaha u naxariistee Marxuumka.
Mas’uuliyiintaasi iyo shaqaalaha wasaaradda ayaa geerida marxuumka uga tacsiyeeyey ehelada, qaraabada iyo fanaaniinta uu ka tagey, waxayna Alle uga baryeen marxuumka inuu u naxariisto islamarkaana Janadii Fardowso eheyd uu ka waraabiyo.
