Guddoomiyaha maamulka Gobolka Banaadir ahna duqa magaalada Muqdisho Xasan Maxamed Xuseen “Muungaab” ayaa shacabka Muqdisho deggan ugu baaqay inay hay’adaha ammaanka la shaqeeyaan si loo ilaaliyo ammaanka shacabka.
Isagoo ka hadlay munaasabad ay ciidamada XDS uga guurayeen fadhiisin ay ku lahaayeen xaruntii Maslax ee Suuqa Xoolaha, ayuu soo dhaweeyay in ciidanka Booliska iyo Nabad-sugiddu ay la wareegaan dhammaan ammaanka magaalada, wuxuu ku tilmaamay tallaabadaas mid wax wanaagsan ka tari doonta nabadda caasimadda.
Guddomiye Muungaab, wuxuu sheegay in dhawaan la bilaabi doono wajiga labaad ee howl-gallo lagu sugayo ammaanka oo ay sameynayaan ciidamada nabad galyadu, dadka shacabka ah ayuu ugu baaqay in ay la shaqeeyaan ayadoo guddoomiye degmooyinka iyo xaafadaha magaaladu ay la shaqeyn doonaan.
Bilihii la soo dhaafay ayuu sheegay Muungaab in hay’adaha ammaanku ay soo qabteen shabakado argagixiso iyo burcad magaalada dhibaatada ku hayay, ayadoo dadka shacabka ahi ay dowr wayn ku lahaayeen howl-gallada lagu soo qabtay.
