Macluumaad dheeraad ah ayaa kasoo baxaya nin heysta dhalashada dalka Australia kaas oo booliiska ay xireen kadib markii lagu eedeeyay in uu wakiil u yahay dowladda Kuuriyada Waqooyi.
Ninkan ayaa lagu magacaabaa Chan Han Choi, waana 59 jir, muddo 30 sano ayuu ku noolaa dalka Australia, halkaas oo uu ka qaatay dhalashada dalkaas.
Booliiska waxa ay sheegeen in uu Kuuriyada Waqooyi u iibinayay hubka wax gumaada, isaga oo jabiyay cunaqabatayntii Qaramada Midoobay.
Waxa ay ku tilmaameen in uu yahay nin aaminsan waddaniyad sare, islamarkaasna u adeegaya si daacadnimo
Sida ay qorayso warbaahinta Australia, ninkan ayaa shaqaale nadaafadeed ka ahaa isbitaal , islamarkaasna kaligiis ku noolaa guri.
Dadkii dariskiisa ahaa iyo kuwii saaxiibada la ahaa ayaa sheegay in ay ninkan xiriirka u jareen kadib markii uu muujiyay taageerada uu u hayo Kuuriyada Waqooyi.
Wuxuu noqonayaa qofkii ugu horeeyay oo lagu xiro Australia, eedeymo la xiriira Kuuriyada Waqooyi.
Waxa uu wajihi karaa 10 sano oo xarig ah haddii lagu helo dacwadda lagu soo oogay.
