Ciidamada Hay’adda Sirdoonka iyo nobad sugidda NISA ayaa qaaday howlgallo gaar ah oo lagu bartilmaameedsanayay goobo cayiman oo ka mid ah Degmmoyinka magaalada Muqdisho.
Ciidamada ayaa gacanta ku soo dhigay gaadiid iyo maleeshiyaad hubeysan oo lagu tuhmayo in ay geesteen dilal 24-kii saac ee la soo dhaafay ka dhacay magaalada Muqdisho, kuwaas oo hadda lagu soo xiray xarunta Nabadsugidda Gobalka Banaadir ee loo yaqaano Godka Jilacoow.
Cabdikaamil Macalin Shukri Afhayeenka Wasaaradda Amniga oo howlgalkan uga Waramay Wakaaladda Wararka Soomaaliyeed ee SONNA ayaa sheegay in ciidamada NISA ay maanta qadeen howlgallo qorsheysan oo laga sameeyay guryo iyo geerarshyo lagu xareeyo gaadiidka, halkaasina lagu soo qabtay kooxo hubeysan oo xogtooda la hayay haddana baaris ayaa ku socoto.
“Ciidanada barro cayiman oo ku kala yaalla Degmmoyinka Wadajir, Kaxda, Hodan iyo Yaaqshiid ayey howlgallo ka sameeyeen kaddib markii la helay xogta dableey hubeysan oo aan la garaneynin halka ay ka tirsanyihiin, waxaa la soo qabqabtay hub, gaadiid iyo maleeshiyaadkii lagu raad joogay, hadda Godka Jilacoow ayaa lagu hayaa, baaris ayaana ku socota, waxaana looga shakisanyahay dilalka qorsheysan ee saacadihii u dambeeyay ka dhacayay magaalada Muqdisho” ayuu Yiri Cabdikaamil.
Dhinaca Kale Afhayeenka Wasaaradda Amniga ayaa sheegay in ku dhawaad 20 ruux lagu soo qab qabtay howlgal kale oo ay xalay Xaafadda Xamar Bile ee Degmada Warta Nabadda ka sameeyeen ciidamada Nabad sugidda, booliska iyo ciidamada AMISOM.
Howlgalkaasi ayaa lagu bartilmaameedsanayay Kooxo looga shakisanyahay in ay ka tirsanyihiin maleeshiyaadka Kooxda Al-Shabaab.
