Maamulka iyo waxgaradka degmada Caabudwaaq ee gobolka Galgaduud ayaa dedaallo ugu jira sidii loo dejin lahaa xiisad ka dhalatay laba nabad-doon oo lagu dilay isla magaalada Caabudwaaq ee gobolka Galgaduud.
Nabad-doon Aadan Jaamac Axmed (Aaden Dhooleey) iyo Nabad-doon Maxamed Barre Diini oo ka mid ahaa madax dhaqameedyada sida weyn looga yaqaan gobolka Galgaduud, ayaa la sheegayaa inay debleey hubeysani ku toogteen bartamaha magaalada Caabudwaaq.
Cuqaasha iyo sama doonnada kale ee gobolka oo kaashana mas’uuliyiinta maamulka ayaa xusul duub ugu jira sidii loo qaboojin lahaa xiisadda ka dhalatay falkan, waxayna cambaarayn xoogganna dusha uga tureen cidda ugaarsanaysa hoggaamiyeyaasha dhaqanka.
Magaalada Caabudwaaq ee gobolka Galgaduud,ayaa maalmihii ugu dambeeyay waxaa ka taagnaa dilal lagu ugaarsanayo waxgaradka,iyo hal doorka magaalada, taasoo salka ku haysa aano qabiil oo muddo soo taxnayd.
