Odayaal iyo dad kale oo mas’uuliyiin ah ayaa ku guuleystay in ay heshiis nabadeed dhex dhigaan labo beelood oo dhowaan dagaal uu ku dhex maray magaalada Beledweyne ee xarunta Gobolka Hiiraan.
Kulamo odoyaal dhaqameed maalmihii la soo dhaafay ay ku lahaayeen magaalada Beladweyne ayay ku guuleyteen inay xal ka gaaraan beelo walaalo ah oo dhawaan ku dagaallantay magaalada Beladweyne, iyadoo min shan xubnood oo labada dhinac ah loo dhaariyay inay ka shaqeeyaan Nabadda, isla markaana ay gacan ka geystaan sidii loo xal waara looga gaari lahaa arrimaha sababay gacan ka hadalka.
Guddoomiyihii hore ee gobolka Hiiraan Yuusuf Axmed Hagar oo kormeeray goobihii dhawaan lagu dagaallamay ayaa ku baaqay in la furo goobaha ganacsiga, isla markaana laga wada shaqeeyo midnimada bulshada gobolka degta.
Taliyaha cidanka xoogga dalka ee gobolka Hiiraan Kornayl Tawane Axmed Hurre oo u taagnaa xalinta khilaafkan ayaa shacabka uga mahadceliyay sida ay ciidanka gacan ugu siiyeen xalinta rashadihii dhawan beladweyne ka dhacday.
Qaar ka mid ah ganacsatada ayaa sheegay inay soo dhaweynayaan dib u furista goobihii ganacsi ee dhawaan lagu dagaalamay iyo heshiiska laga gaaray waxyaabihii lagu dagaalamay.
