Sumad/Ref/00671/WGW/15 Tr/Date 8/20/2015
Wasaaradda Ganacsiga iyo Warshadaha Jamhuuriyadda Federaalka Soomaaliya waxay ku wargelinaysaa dhamaan ganacsatada dibadaha wax ka keena iyo kuwa u dhoofiyaba in laga bilaabo 15 bisha Sebtember, 2015 guud ahaan Soomaaliya laga hirgelin doono nidaam taya dhawr si loo ilaaliyo deegaanka iyo faya dhawrka shacabka Soomaaliyeed.
Badeecooyinka dalalka laga soo dhoofiyo inta aanan laga soo rarin waxaa lagu sameyn doonaa baaritaan lagu ogaanayo tayada, kaddibna waxaa la siinayaa shahaado tayo oo caddeynaysa in badeecadaasi ay tayadeedu waafaqsantahay heerkii loogu tala galay.
Barnaamijkan waxaa fulin doona Shirkadda PGM oo khibrad dheer u leh baaritaannada tayada badeecooyinka kala geddisan, kana hawl gasha in ka badan 40 dal, xarunteeduna tahay dalka Turkiga, taas oo ay xukuumadda Soomaaliya, gaar ahaan Wasaaradda Ganacsiga iyo Warshadaha, heshiis kula gashay in ay koontarool ku sameyso dhammaan badeecadaha dalka soo galaya si loo hubiyo fayo dhawrka dadka iyo deegaanka oo dayacnaa 25kii sano ee lasoo dhaafay.
Shahaadooyinka ay bixiyaan xafiisyada PGM ee dibadda waxaa mar kale lagu hubin doonaa dekadaha iyo garoomada Soomaaliya oo ay shaqaalaha shirkaddu ku suganyihiin si looga hortago in la sameysto shahaadooyin been abuur ah.
Sidaa darteed waxaa ganacsatada Soomaaliyeed laga codsanayaa in ay ku wargeliyaan shirkadaha dibadda ee ay xiriirka la leeyihiin waqtiga dhaqan gelinta barnaamijkan eek or ku xusan. Qaabka shahaadooyinka loo bixiyo iyo xafiisyada shirkadda ee ay ganacsatada la xiriiri karaan ee daafaha dunida waxaa laga akhrisan karaa www.pgminspection.com. Sidoo kale haddii aad codsanayso in shahaado laguu soo saaro waxaad farriin u direysaa email-kan [email protected].
15ka bisha Sebtember waxay shirkadda PGM bilaabaysaa shahaadooyin ku meel gaar ah oo caddeynaya tayada badeecadaha la keenayo Soomaaliya. Shahaadooyinka waa la bixinayaa xitaa haddii aysan badeecadu gaarsiisnayn heerkii la rabay, balse waxaa lagu wargelinayaa qofka leh in tayada badeecadu aysan ahaydn heerkii la rabay. Shahaadooyinkaas kumeel gaarka ah waxay bixintoodu soconaysaa ilaa 31ka Oktoobar, 2015.
1da bisha Nofeembar, 2015 waxaa toos u dhaqan galaya barnamaijka tayo dhawrista, mana la ogolaan doono badeeco aan haysan shahaado tayo dhawr, lamana soo gelin doono dalka badeeco tayadeedu ka liidato heerkii loogu tala galay taasoo deegaanka iyo dadkaba caafimaadkooda dhibaato ku keeni karta.
Ugu dambeyntii, waxaa la ogeysiinayaa dhammaan ganacsatada dibadda wax ka keena in uu bilaabmi doono siminaar ku saabsan sida hawshu u soconeyso, looguna gudbin doono qaabka wax loo baarayo iyo su’aalaha kale ee ay qabaan. Siminaarradaas waxay ka dhici doonaan dalalka Cumaan, Imaaraatka Carabta, Shiinaha, Kenya iyo Soomaaliya. Goobaha iyo taariikhda ay dhici doonaan waxaad ka akhrisan kartaa jadwalkan hoose.
Wixii faahfaahin intaasi dheer kala xiriir www.pgminspection.com/Somalia.
| Taariikh | Maalin | Dalka | Meesha |
| 8/25/2015 | Talaado | Wafdiga PGM ayaa tagaya dalka Cumaan | |
| 8/26/2015 | Arbaco | Siminaar ku saabsan habka tayo baarista | Hotel Hayatt/ Muscat Saacadaha Siminaarka: 16:00- 19:00 |
| 8/27/2015 | Khamiis | Sinimaar ka dhacaya Imaaraatka Carabka | ROTANA ALL GUREIR HOTEL, Dubai Saacadaha 16:00- 19:00 |
| 8/28/2015 | Jimco | Wafdiga PGM ayaa tagaya dalka Shiinaha | |
| 8/29/2015 | Sabti | Siminaar ka dhacaya Shiinaha | CROWN PLAZA / Guangzhou – Saacadaha: 16:00- 19:00 |
| 8/30/2015 | Axad | Istanbul ayay Wafdiga ku laabanayaan | |
| 9/2/2015 | Arbaco | Kenya ayay usoo safrayaan | |
| 9/3/2015 | Khamiis | Siminaar ayaa ka dhacaya Kenya | Laico Regency Hotel Nairobi Saacadaha: 16:00- 19:00 |
| 9/4/2015 | Jimco | Soomaaliya ayay imaanayaan | |
| 9/5/2015 | Sabti | Siminaar iyo tababar dhanka shaqaalaha ah | Goobta wali lama cayimin. Saacadaha 16:00- 19:00 |
| 9/6/2015 | Axad | Soomaliya ayay joogayaan | |
| 9/7/2015 | Isniin | Istanbul ayay ku laaban doonaan |
___________________________________________________________________________________________
E-mail : [email protected]
Contact phones: +252-612228222
Tel/Fax No: 252 1 856976
