Dowlad gobaleedka Soomaaliyeed ee Puntland ayaa sheegay in ciidammo gaar ah ay u direen degmada Qandala kuwaasi oo ka soo galaya dhinaca Badda, si guud ahaan degmada looga saaro maleeshiyaadka Argagixisada ah ee Daacish oo horay u qabsaday degmadaas.
Wariyaha Warbaahinta Qaranka Ibraahim Saciid Saalax ayaa soo sheegaya in ciidamadaan sidoo kale loogu talagalay inay ka hor tagaan kooxaha Argagixisada oo laga yaabo inay gurmad ka helaan xaga Badda.
Ciidamada Puntland ayaa haatan kaabiga ku haaya degmada Qandala iyadoo shalayna uu dagaal xoogan dhexmaray ciidanka Puntland iyo Maleeshiyada Argagixisada ah.
Saraakiisha Puntland ayaa sheegay in maleeshiyadaan ay gabaad ka dhiganayaan dhulka Buuralayda ah ee Qandala, hayeeshee waxay sheegeen inay howlgalada siisocon doonaan ilaa ay ka saaraan maleeshiyadaan degmada ka tirsan gobalka Bari.
Maleeshiyaadka Argagixisada ah ee ku sugan qaybo ka mid ah Soomaaliya ayaa dhibaato badan ku haaya dad Soomaaliyeed iyada oo waliba deegaanada qaar ay ku dhufteen Abaaro aad u saameeyay dadka iyo duunyada.
