Jimciyadda quruumaha ka dhaxaysa ayaa shaaca ka qaadday inay 25,700 oo Qof ku barakaceen Dagaalkii dhowaan ka dhacay Magaalada Qandala ee Gobolka Bari, kaasoo u dhaxeeyay Ciidanka maamul Goboleedka Soomaaliyeed ee Puntland iyo Ururka Daacish.
Hay’adda Qaramada midoobay u qaabbilsan Bini’aaddannimada ee OCHA ayaa intaasi raacisay in Dadka halkaasi ka cararay ay badankood yihiin Haween, Carruur iyo Dad waayeel ah, kuwaasoo u barakacay Tuulooyin ku hareereysan Degmada Qandala, halka kuwa kalena ay aadeen Magaalada Boosaaso oo 75 KM u jirta Qandala.
Saraakiisha Ciidamada Puntland ayaa sheegay inay Magaalada kulaasha Badweynta Hindiya ee Qandala ay si buuxda ula wareegeen Arbacadii, markii ay kula dagaallameen Malleeshiyada Daacish ee uu hoggaamiyo Sheekh C/qaadir Muumin, kuwaasoo Gacanta ku hayay tan iyo dabayaaqadii Oktoobar ee Sanadkan.
UN-OCHA ayaa sheegtay in saaxiibbada qaabbilsan dhanka bini’aadannimada iyo madaxda maxalliga ah ay ka walaacsan yihiin inay sii xumaato xaaladaha Dadka barakacay, markii lasoo wariyay in Shacabkii halkaasi ka barakacay ay ku jiraan xaalado nolal xumo iyo Biyo la’aan.
