Kufsi waxaa uu ka mid yahay dembiyada cul-culus ee Saxaafaddu ay tahay in ay aad uga fiirsato qaabka ay u tebineyso.
Yuusuf Garaad Cumar Axmed oo muddo ku shaqeynayay howsha Saxaafadda ayaa bartiisa Facebook-ga soo dhigay qoraal uu uga waramayo Tabta Tebinta Kufsiga, waxaana uu aad uga faallooday qaabkii loo baahiyay waxa uuna qoraalkiisa ku yiri “Maalmahaan waxay saxaafadda Soomaalida oo ay ku jirto midda bulshadu aad uga hadashay Kufsi ka dhacay Mudug oo kiciyay dareenka dad badan oo samaha jecel. Aniga waxaa ii dheeraa in aan si gooni ah ugu dhug lahaa sida loo tebinayay warka”.
“Waxaan weriyayaasha iyo qorayaasha saxaafadda bulshada la wadaagayaa khibrad ku saabsan sida looga warramo kufsi”, ayuu yiri Yuusuf Garaad.
Khibrad, aqoon guud iyo mid qaanuun in lala kaashado ka sokow, Saxaafadda tebineysa kufsi waxaa habboon in Tifatiraha ugu sarreeyaa uu ka warhayo habka loo dhigayo warka, mas’uuliyadda kama dambeysta ah ee go’aanka tebintana uu isagu qaataa.
Suxufi Yuusuf Garaad waxaa kaloo qormadiisa ku xusay “Xeerarka Saxaafadda ee aan muddo dheer ku soo shaqeeyay, in bandanna aan tababbar uga bixiyay London iyo caasimado badan oo Afrika ahi waxay qabaan in haddii uu dhaco kufsi oo ah faldembiyeed aad u culus aan la sheegin magaca dhibbanaha” ayuu ku sheegay qoraalkiisa.
Dalalka qaarkood sida UK wuxuu sharcigu qabaa in aan abid la soo hadal qaadin magaca dhibbanaha kufsi iyo xataa in aan la sheegin tilmaan lagu garan karo qofka la kufsaday, waxaa kaloo arrintasasi qaba Garsoorka marka dacwadda la qaadayo aan laga sheegin goobta, marka Saxaafaddu ha iska ilaaliso ama ha dhowrto qaabka tebinta ama faafinta Wararka noocasi oo kale ah.
Qaabka ay Warbaahintu u tabisay Wararkii ku saabsanaa Kufsi loo geystay Gabar Soomaaliyeed oo ku dhaqan Gobolka Mudug ayaan aheyn mid loo faafiyay qaabka loo faafiyo Wararka ku saabsan Kufsiga iyo tacadiyada kale ee loo geysto hablaha, waayo qofka loo geystay Gabood Falkaasi ayaa waxaa loo baahiyay qaab wax u dhimaya sumcadda iyo sharafta Qofka loo geystay, iyadoo magacii iyo Sawirradii qofkaasi oo lagu baahiyay Warbaahinta gaarka loo leeyahay iyo Baraha Bulshada, waana dambi laga galay Ruuxaasi.
Warbaahintu waa inay bartaan qaabka loo baahiyo Wararka ku saabsan Gabood Fallada, haddii kale waxay mar kale dambi ka galayaan qofkii dhibanaha ahaa.
