Dhul beereedka ku teedsan Degmada Xudur inta badan waxa lagu beeraa dalagyada kala ah Masago, Galey iyo Digir waana soo jireyn qarniyaal ka hor la beeran jiray, waxa hoos u dhacay wax soo saarka beeraha oo sababay abaaro soo noq noqday, cuduro cid daawaysa laheyn oo dalagyada aafeeya iyo beeralayda oo aan fahamsanayn in dalagyo kale looga faa’ideysan karo beeraha.
Aadan Axmed Maxamuud waxa uu ka mid yahay beeralayda Degmada Xudur ku nool waxa uu isbedel ku sameeyey dalagyada uu beerto oo suuq fiicana ka heley.
Aadan xilligaan beertiisa waxa ka soo go’ay miraha qaraha oo inta badan laga keenijirey gobolka Hiiraan, wuxuuna aaminsanyahay in wax walba laga soo saari karo beeraha oo cid kale aan gacan loo hoorsan.
Bulshada ku dhaqan gobolka Bakool 90% noloshooda waxay ku tiirsan tahay dhaqashada Xoolaha iyo tacbashada beeraha, waxayna u baahanyihiin in Wasaaradaha quseeya ay dardar geliyaan.
Sanad kohor ayaa xaruunta Xanaanada Xoolaha Degmada Xudur dayactir lagu sameeyey haseyeshee waa goob xiran oo aan shaqo ka socon, xarunta Wasaaradda Beeraha Gobolka Bakool waa mid burbursan oo aan dayactir helin tan iyo burburkii dowladii dhexe, beeralayda Gobolka waxay ka cabanayaan in Wasaaradda beeraha ay ka gaabisay adeegyadii ay uga baahnaayeen dadka beeraleyda ah.
