Madaxweynaha Dowlad Goboleedka Koonfur Galbeed Soomaaliya Mudane Cabdicasiis Xasan Maxamed (Lafta gareen) iyo wafdi uu hogaaminayo ayaa lagu wadaa in saacadaha soo socda uu gaaro magaalada Xudur ee xarunta Gobolka Bakool.
Maamulka Gobolka Xudur, kan degmada iyo qeybaha bulshada magaalada ayaa iminka ku sugan garoonka diyaaadaha magaalada, kuwaasi oo diyaar u ah inay ka qeyb qaataan soo dhaweynta Wafdiga Madaxweynaha Koonfur Galbeed.
Sidoo kale cutubyo ka tirsan ciidamada maamulka Koonfur Galbeed iyo kuwa xoogga dalka ayaa soo gaaray Garoonka, si ay salaan sharaf uga qaataan Madaxweynaha Koonfur Galbeed.
Wariyaha Warbaahinta Qaranka ee Gobolka Bakool Maxamed Xasan Cabdiraxmaan ayaa ku soo waramaya in ujeedka socdaalka wafdiga Madaxweynaha Koonfur galbeed Mudane Cabdicasiis Xasan Maxamed (Lafta gareen) ay tahay sidii uu xariga uga jari lahaa saldhigga booliska ee magaalada Xudur oo uu kal hore isagu dhagax dhigay iyo sidii uu kulamo ula qaadan lahaa qeybaha kala duwan ee magaalada ku sugan.
Waxaa si aad ah loo adkeeyay amniga waddooyinka soo gala magaalada Xudur.
