Ururada African Development for Education and Health iyo Somali Health and Educatoin Development oo fadhigoodu yahay dalka Maraykanka ayaa laba konteenar oo ka kooban qalab caafimaad ugu deeqay iisbitaalada ku yaalla degmooyinka Jariiban iyo Caabudwaaq, waxaana soo raridiisa fududeeyay Jaaliyadda magaalada Seattle ee Gobolka Washington.
Wakiilo ka kala socday Jariiban iyo Caabudwaaq, ayaa lagu wareejiyay qalabka caafimad, kuwaasi oo gaarsiin doona Isbitaalada loogu deeqay.
Cabdirisaaq Maxamed Xalane oo ah Wakiilka Caabuqwaaq ka socday ayaa Guddoomay saamiga qalabka ee ay lahayd degmada Caabudwaaq, halka Sadiiq Cabdulqaadir oo ahaa Wakiilka degmada Jariiban uu isna Guddoomay qaybta qalabka ee ay lahayd degmada Jariiban, waxaana ay ka mahadceliyeen qalabka la soo gaarsiiyay, iyagoo balan qaaday in ay gaarsiin doonaan halkii loogu talagalay.
“Waxaan u mahacelinayaa Ururada African Development for Education and Health iyo Somali Health and Educatoin Development iyo Jaaliyadda kaso jeeda degmooyinka Caabudwaaq iyo Jariiban, waxaana balanqaadaynaa in qalabka sida ugu dhakhsaha badan loo gayn doono isbitaalada loogu deeqay” ayuu yiri Sadiiq Cabdulqaadir
Qalabka Caafimaad ayaa imanaya xilli degmooyinka Jariiban iyo Caabudwaaq ay baahi wayn u qabeen kor u qaadida Adeegyada Caafimaadka.
