Ciidamada ammaanka ayaa gacanta ku dhigay tiro dad ah oo lala xiriirinayo qarax gelinkii dambe ee maanta ka dhacay magaalada Kismaayo ee xarunta Gobolka Jubbada Hoose.
Ciidamada ayaa xog dheeraad ah ka helay telefonkii gacanta ee uu watay dhagarqabihii isku qarxiyay magaalada Kismaayo, taasi oo suurta gelisay in lagu soo qabto tiro dad ah.
Dhagar qabaha isqarxiyay ayaa doonayay in uu galo mid ka mid ah xarumaha ciidamada Nabadsugidda ee magaalada Kismaayo, gaar ahaan xaafadda Far-janno.
Aadan Maxamed Salaad Wariyaha Warbaahinta Qaranka oo goor dhaw la hadlay Radio Muqdisho ayaa sheegay in falkaasi ay ku dhinteen labo ruux oo mid ka mid ah ahaa qofkii isqarxiyay iyo gabar todobo jir ah oo goobta ku ganacsaneysay, kadib markii uu iskudayay in uu isku tuuro gaari ciidamada NISA ay wateen, balse uu meel cidlo ah ku dhacay.
Falka ayaa waxaa ku dhaawacmay labo kale oo rayid ah, kuwaasi oo lagu dabiibayo mid kamid ah xarumaha caafimaadka ee magaalada Kismaayo
Kornayl Axmed Muuse madaxa dambi baarista ee ciidanka Nabad sugidda ayaa Warbaahinta Qaranka u xaqiijiyay in tiro dad ah loo soo qabtay caawa falkii maanta ka dhacay Kismaayo, ayna socdaan baritaanno dheeraad ah.
