Qaramada Midoobay ayaa sheegtay inay kala shaqeyneyso Xukuumada Suudaan sidii loogu gargaari lahaa in ka badan 7-kun oo qaxooti ah kuwaasi oo ka soo cararay colaadaha ka jira gobalka Tigreega ee dalkaasi Itoobiya.
Dalka Suudaan oo xuduud la wadaaga dalka Itoobiya ayaa maalmihii la soo dhaafay waxaa ku qulqulaayay dad fara badan oo ka soo qaxay dagaalka u dhaxeeya Jabhadda Xoreynta Tigreega iyo Ciidamada Itoobiya.
Afhayeen u hadlay UN-ka ayaa sheegay in dowladda Suudaan iyo Qaramada Midoobe ay ka shaqaynayaan sidii loo diiwaan gelin lahaa dadka ka soo qaxay Itoobiya si loo gaarsiiyo gurmad deg deg ah.
Afhayeenka ayaa kula dardaarmay dowladdaha deriska la ah Itoobiya inay xuddoodahooda u furan dadka ka soo cararaaya dagaalada si loo badbaadiyo dadka rayidka ah.
Dowladda Suudaan ayaa hore ugu baaqday beesha caalamka in loo soo gurmado dadkaan soo qaxay, iyadoo sheegtay in tiradu maalin ba maalinta ka danbeysa sii kordhayso.
