Wasiirka Ganacsiga iyo Warshadaha Xukuumadda Federaalka Soomaaliya Jibril Cabdirashiid Xaaji Cabdi, ayaa maanta guddoomiyey shirkii toddobaadlaha ahaa ee Wasaaradda oo laga ga hadlay qorsheyaasha hor-tebinta u leh Wasaaradda oo ay ugu muhiimsan yihiin dhammeystirka heshiisyada ganacsiga, horumarinta ganacsiga iyo unkidda jawiga maal-gashiga, soo noolaynta Warshadaha iyo Warshadaynta dalka iyo weli ba kobcinta dhaqaalaha iyada oo loo maraayo horumarinta ganacsiyada gaarka ah.
Shirka, ayaa waxa ka soo qeyb-galay Wasiir ku xigeenka Wasaaradda Xildhibaan Osman Mohamed Abdi(Daalo), Agaasimaha guud Mudane Abdiaziz Ibrahim Adan iyo weli ba sidoo kale Agaasime Waaxeedyada Wasaaradda, waxaana ujeedkiisu ahaa dar-dar-gelinta hawlaha shaqo ee Wasaaradda, iyo weli ba sidoo kale kor-u-qaadista isla-xisaabtanka Wasaaradda dhexdeeda.
Qorshahan oo muddooyinkii dambe ay ku hawlanayd Wasaaraddu, ayaa dhammeystiri doona wada-xaajoodyada heshiisyada ganacsi ee laba geesoodka ah, ka mid noqoshada ururada ganacsi ee gobalka iyo aduunka, dib-u-eegista sharciyada, heshiisyada, siyaasadaha, iyo weli ba hawl-gelinta xarunta mideynta adeegyada ganacsiga ee dawladda. Waxa kale oo laga hadlay istaraatijiyadda lagu xoojinayo shirkadaha Gaadlayda yar-yar iyo kuwa dhaxe iyo iskaashatooyinka.
