Wafdiga uu hogaaminayo Ra’iisul wasaaraha Soomaaliya Mudane Cumar Cabdirashiid Cali Sharma’arke oo gaaray magaalada Garoowe ee xarunta Gobolka Nugaal ayaa waxaa halkaasi si diiran ugu soo dhaweeyay Madaxda dowlad goboleedka Puntland.
Soo dhaweynta Ra’iisul wasaaraha waxaa sidoo kale ka soo qeyb-galay Wasiiro, Xildhibaanno, waxgarad, siyaaasiyiin, aqoonyahanno, haween, Dhallinyaro iyo mas’uuliyiin kale.
Madaxweynaha Dawlad Goboleedka Puntland Dr. Cabdiweli Maxamed Cali Gaas oo ka hadlay booqashada Ra’iisul wasaaraha ayaa tilmaamay inay aad ugu faraxsanyihiin socdaalkiisa.
”Waxaa sharafweyn noo ah maanta inaan soo dhaweyno Ra’iisul wasaaraha Soomaaliya Mudane Cumar Cabdirashiid oo nagu soo gaaray socdaal yar oo gaaban , waxaana uu Ra’iisul waasaruhu u yimid inaanu ka wada tashano arrimo ku saabsan xiriirka Dowlad goboleedka Puntland iyo tan Federaalka ah” ayuu yiri Dr Gaas.
Ra’iisul wasaaraha Xukuumadda Federaalka Soomaaliya Mudane Cumar Cabdirashiid Cali Sharma’arke ayaa dhankiisa muujiyey inuu si aad ah ugu faraxsanyahay socdaalka uu ku tegay Garoowe, isagoo inta aan magaaladaasi gaarin, kulamo la qaatay Madaxda dowlad goboleedka Galmudug.
