Shirkan ka dhacay Xafiiska Ra’iisul wasaaraha ee uu shir guddoominaye, mudane Cumar Cabdirashid Cali Sharma’arke Ra’iisul wasaaraha Xukuumadda Federaalka Soomaaliya, ayaa looga hadlayey dardargelinta qorsha barnaamijka New Deal ama Hiigsiga cusub ee Soomaaliya, iyadoo ay ka soo qeyb-galeen wadamada deeq-bixiyeyaasha ee barnaamijkaasi taageero iyo guddiga Xukuumadda ugu xilsaaran howshaasi oo ay hormuud ka tahay wasaaradda Qorsheynta, kuwaas oo ka kooban todoba wasaaradood.
Wasiirka Qorsheynta iyo Iskaashiga Caalamiga ah ee Xukuumadda Federaalka Soomaaliya, Mudane Cabdiraxmaan Yuusuf Cali Ceynte, ayaa warbaabinta Qaranka la hadlay shirkaasi markii uu dhammaaday kaddib, waxa uu sheegay in u jeedada kulankaan uu ahaa sidii loo dardargelin lahaa hannaanka qorshaha New Deal-ka ama hiigsiga cusub, waxa uu intaa raaciyey in si qota dheer looga dooday sida lo amba qaadi karo qorshan, iyadoo deeq bixiyeyaasha loo gudbiyey doorka hoggaamineed ee dowladda.
Wasirika Qorsheynta iy Iskaashiga Caalamiga ah ee Soomaaliya, Cabdiraxmaan Ceynte, ayaa tilmaamay in shirkan lagu go’aamiyey qabsoomidda madasha lagu saxiixayo mashaariicda New Deal-ka kaas oo ka dhici doono magaalada Muqdisho 23-ka bishan, wasaaradda Qorsheyntana ay xiriirin doonto qorshaha guddiga u xilsaaran Hiigsiga cusub ee uu Ra’’iisul wasaaraha Soomaaliya hoggaaminayo.
Dardargelinta barnaamijka hiigsiga cusub ee Soomaaliya ee labada sano ee soo socota waa hanaanka Soomaaliya looga hirgelinayo mashaariicyo kala duwan oo ay ka mid yihiin dhismaha iyo tayeenta hey’adaha heer Federaal iyo dowlad gobolleed si loo gaaro doorashooyin ka dhaca Soomaaliya 2016-ka, kuwaas oo ay Xukuumaddan dooneyso in sida ugu dhaqsiyaha badan loo horumariyo howlahooda.
