Ra’iisul wasaaraha Soomaliya Mudane Cumar C/rashiid iyo wefdi oo hogaaminaayo oo saaka ka ambabaxay magaalada Muqdisho ayaa Duhurnimadii maanta gaaray magaalada Garoowe ee xarunta maamulka Puntland.
Wefdiga Ra’iisul wasaare Cumar markii ay gaareen magaaladaasi ayaa waxaa si diiran u soo dhaweeyay madaxweynaha maamulka Puntland Mudane C/wali Maxamed Cali Gaas, qoliyaasha maamulkiisa iyo dadweyne aad u badan kuwaas oo wefdiga ku sugayay garoonka diyaaradaha ee magaalada Garoowe.
Wariyaha Warbaahinta Qaranka ee magaalada Garoowe Cabdi Xasan Rooble ayaa soo sheegaya in Amaanka magaalada Garoowe si aad ah loo adkeeyay isla markaana ciidanka Amniga ay joojiyeen dhaq dhaqaaq gaadiidka iyo dadweynaha ee magaaladaasi.
Wefdiga ayaa loo gelbiyay xarunta madaxtooyada ee maamulka Puntland halkaas oo la filayo in ay saxaafadda kula hadlaan Ra’iisul wasaare Cumar C/rashiid iyo Madaxweynaha maamulka Puntland isla markaana Ra’iisul wasaaruhu ka warbixiyaan u jeedada socdaalkiisa.
