Ra’iisul wasaare ku-xigeenka Xukuumadda Federaalka Soomaaliya ayaa sheegey in Xukuumaddu ay xoogga saari doonto sidii daryeel ay u heli lahaayeen dadka bulshada unugul gaar ahaan naafada, kana dalbaday Wasaaradda caafimaadka in ay hagaajiso xarumaha caafimaadka, si loogu adeego bulshada.
Mudane Maxamed Cumar Carte Qaalib oo ka hadlayay munaasabad shaqsiyaad u dhaq dhaqaaqa xaquuqda dadka aan lixaadooda dhameystirneyn lagu abaalmarinayay ayaa xusay in Xukuumadda ay ilgaar ah siineyso wax u qabashada dadka tabaaleysan, gaar ahaan naafada oo ku sheegay inay tahay waajibaad qofkasta oo muwaadin ah ay ka saarantahay.
“In dadka aan lixaadooda dhameystirneyn loo istaago oo wax loo qabto, waa mid waajib nagu ah, hooyinka ayaa inta badan dhibka dadka dhimirka la’ la qeybsada, marka waxaan dooneynaa in wixii aan ka qaban karno aan ka qabano, dadka kale arrimahan wax ka qaban karo dhankooda ay u istaagaan, oo Wasaardda caafimaadkana ay gacan ka geysato sidii dib loo furi lahaa isbitaalka dadka dhimirka la’.”ayuu yiri Ra’iisul wasaare ku-xigeenka.
Wasiirka caafimaadka ee Xukuumadda Soomaaliya Drs Xaawo Xasan Maxamed ayaa sheegtay in Wasaaradda ay waddo siyaasadda Qaranka ee dhanka caafimaadka, isla markaana ay qorshaha ugu jirto sidii dadka naafada ah ay u heli lahaayeen adeegyo caafimaad oo dhameystiran.
“Wasaaradda caafimaadka waxa ay idin balan qaadeyso in wixii ay ka qaban karto daryeelka caafimaadka ay idinla diyaartahay, waxaan qorsheyneynaa in aan dib u howlgelino isbitaalada oo aan qalabeyn iyo tababar siino howlwadeenada caafimaadka, si dadku ay u helaan adeeg caafimaad oo tayo leh” ayay tiri Wasiirka Caafimaadka Drs Xaawo.
