Ra’iisul Wasaare ku xigeenka Xukuumadda Federaalka Soomaaliya Mudane Mahdi Maxamed Guuleed (Khadar) ayaa Maanta kormeer shaqo ku yimid xarunta Wasaaradda Warfaafinta Dhaqanka iyo Dalxiiska Soomaaliya.
Mudane Mahdi ayaa waxaa Wasaaradda ku soo dhaweeyay Wasiirka ku xigeenka Wasaaradda Warfaafinta Cabdiraxmaan Iidaan Yoonis. Agaasimaha guud ee Wasaaradda Warfaafinta Cabdiraxmaan Sh. Yuusuf (Al-Caddaala) iyo Agaasimeyaasha Waaxyaha ee Wasaaaradda.
Ra’iisul Wasaare ku xigeenka ayaa intaa ka dib waxa uu kulan la qaatay Ku simaha Wasiirka Warfaafinta ahna Wasiir ku xigeenka Mudane C/raxmaan Iidaan Yoonis iyo Agaasimaha guud ee wasaaradda warfaafinta C/raxmaan Sh. Yuusuf (Al-caddaala), isagoo ka dhagaystay war bixin ku aaddan howlaha shaqo ee ay wasaaraddu u hayso Qaranka Soomaaliyeed.
Ra’iisul wasaare ku xigeenka ayaa kulanka kaddib booqday qaybaha kala duwan ee ay Warbaahinta Qaranka ka koobantahay oo uu ugu horreeyo kaydka baaxadda weyn ee Radio Muqdisho, isagoo bogaadiyay howlaha shaqo ee ka socda Wasaaradda.
“Waxaa farxad weyn ii ah in wasaaradda warfaafinta aan eego habka shaqada ay ugu socoto Wasaaradda, Wasiirka Agaasimaha guud iyo Agaasimayaasha waxaan soo kormeernay qaybaha kala duwan ee Wasaaradda , waxaan ku ammaanayaa howl wadeennada keydka sida ay u xafideen taariikhda Ummada Soomaaliyeed “ayuu yiri Mudane Mahdi.
Mudane Mahdi Maxamed Guuleed (Khadar) ayaa intaa raaciyay in sanadkan 2018-ka uu yahay sanadkii shaqada iyo wax qabadka, wuxuuna howl-wadeennada ku boorriyay inay la yimmaadaan howlkarnimo dheeri ah, wuxuuna sheegay inay wasaaradda Warfaafintu tahay hagaha iyo jiheeyaha Ummada Soomaaliyeed, waxanay ku jirtaa kaalin muhiim ah.
Ra’iisul Wasaare ku xigeenka ayaa howl wadeennada Wasaaradda wuxuuna kula dardaarmay inay dedaalkooda sii laba jibbaaraan, wuxuuna faray dhabar adayg iyo inay ka dhabaeeyaan hal ku dhigga ah hadal yar iyo howl badan.
