Wasaaradda Caafimaadka ee xukuumadda Federaalka ah ee Soomaaliya ayaa maanta la wareegtay deeq dawo ah oo ay soo dhiibtay dowladda Masar.
Munaasabaddii lagu wareejinayay deeqdaasi dawada ah oo lagu qabtay garoonka diyaaradaha Aadan Cadde ayaa waxaa goob joog ka ahaa agaasimaha guud ee wasaaradda caafimaadka Dr. C/laahi Xaasi, Danjire ku xigeenka safaarada Masar ee Soomaaliya Axmed Shedid, Qunsulka safaarada Masar ee Soomaaliya Tamir Safwad iyo Danjire ku xigeenka safaaradda Soomaaliya ee Masar Ilyaas Sheekh Cumar.
Danjire ku xigeenka Safaarada Masar ee Soomaaliya Axmed Shedid oo halkaasi ka hadlay ayaa sheegay in deeqdan oo ka kooban 13 Tan oo dawo ah ay soo dhiibeen shacabka iyo dowladda Masar wuxuuna dawadaasi ku wareejiyay agaasimaha guud ee wasaaradda Caafimaadka.
Dr. C/laahi Xaashi oo ah agaasimaha guud ee wasaaradda Caafimaadka X. F. S. oo deegdaasi la wareegay ayaa dowladda Masar uga mahadceliyay deeqdan ay usoo dhiibeen ummadda Soomaaliyeed.
