Kulankan oo uu shir guddoominayay Ra’iisul Wasaare ku-xigeenka dalka Mudane Maxamed Cumar carte, waxaa ka qeyb galay Wasiirada Qorseynta, Howlaha Guud, Haweenka, Wasiiru-dowlaha arrimaha gudaha, ku-xigeenka Wakiilka gaarka ah ee Qaramada Midoobay u qaabilsan Soomaaliya, mas’uuliyiin ka socday maamul goboleedyada dalka, wakiilo ka socday gobollada Hiiraan, Shabeelaha Dhexe iyo Benaadir iyo hay’adaha Qaramada Midoobay ee dhanka beni’aadanimada, kaasi oo lagu qabtay Muqdisho.
Shirka ayaa diiradda lagu saaray sida wax loogu qaban karo barakacayaasha Soomaaliya, iyadoo xubnihii ka socday maamul goboleedyada iyo gobolada kale ee dalka ay madasha ka sheegeen in xilligan ay muhiim tahay in wax loo qabto barakacayaasha.
Wasiirada shirka ka qeybgalay oo dhankooda kulanka hadalo ka jeediyay ayaa tilmaamay hanaanka loo marayo sidii wax loogu qaban lahaa barakacayaasha, isla markaana loo sameeyo fursado shaqo abuur ah oo ay noqdaan dad door ku leh horumarka dalka..
Ku-xigeenka Wakiilka gaarka ah ee Qaramada Midoobay u qaabilsan Soomaaliya Peter De Clercq ayaa sheegay in Qaramada Midoobay ay toban kun oo doolar ay ugu yabooheyso barakacayaasha, kaasi oo loo kala qaadi doono qeybta horumarinta iyo qeybta beni’aadanimada, waxaana deeqdan ay noqon doontaa mid fursad u sineysa in dadka barakacayaasha ay fikrado keenaan.
Ra’iisul Wasaare ku-xigeenka dalka Mudane Maxamed Cumar Carte ayaa sheegay in 10% dadka Soomaaliyeed ay yihiin barakacayaal, loona baahanyahay in ahmiyada koowaad la siiyo sidii wax loogu qaban lahaa, isagoo bogaadiyay barnaamijka Qaramada Midoobay ee wax loogu qabanayo barakacayasha.
Mudane Maxamed Cumar Carte Ra’iisul wasaare ku-xigeenka dalka ayaa magacaabay guddiyo heer Wasiir iyo mid farsamo oo ka shaqeynaya siyaasadda Qaranka ee barakacayaasha, kaasi oo noqon doono hanaanka lagu hagayo wax u qabashada barakacayaasha Soomaaliyeed.
Shirkan ayaa si wada jir ah la isugu raacay in waxqabad muuqdo ay la yimaadaan hay’adaha Qaramada Midoobay, si loo caawiyo barakacayaasha.
