Ra’iisul Wasaare Ku-xigeenka Xukuumadda Jamhuuriyadda Federaalka Soomaaliya, Mudane Saalax Axmed Jaamac, ayaa maanta kormeer shaqo ku yimid Wasaaradda Cadaaladda iyo Arrimaha Dastuurka halkaas oo uu kusoo dhaweeyay Wasiirka Wasaaradda, Mudane Xasan Macallin Maxamuud iyo madaxda kale ee wasaaradda.
Intaa kadib Ra’iisul Wasaare Ku-xigeenka ayaa kulan gaar ah la qaatay Wasiirka isagoo ka dhageystay warbixinta howlaha wasaaradda oo ay ka mid yihiin dhaqangelinta istiraatiijiyadda cadaaladda dalka, dib-u-habaynta shuruucda iyo latashiyada bulshada ee dhamaystirka dastuurka.
Mudane Saalax Axmed Jaamac, ayaa sidoo kale kormeeray waaxyaha kala duwan ee wasaaradda, isagoo warbixino ka dhageystay hormuudka waaxyaha sidoo kale waxaa uu bogaadiyay dadaallada wasaaradda gaar ahaan dib-u-habaynta nidaamka cadaaladda ka qeyb-galinta dadweynaha ee dib-u-eegista dastuurka iyo howlaha muhiimka ah ee wasaaradda ay wado, isaga oo ku ammaanay hufnaanta iyo shaqada baaxadda leh ee ay qabtaan.
