Ra’iisul Wasaaraha Xukuumadda Federalka Soomaaliya Mudane Maxamed Xuseen Rooble ayaa sheegay in Xukuumadda oo 3 bilood jirsatay ay waxqabadkeedii 100 ka maalmood ka jeedin doonto Golaha Baarlamaanka Talaadada 9-ka bisha Febraayo 2021.
Ra’iisul Wasaare Maxamed Xuseen Rooble ayaa waxyaabaha uu xoogga saaray muddada uu xilka hayo waxaa ka mid ah dadaallada dib-u-heshiisiinta, dardar gelinta hannaanka Doorashooyinka Qaranka, dhiira-gelinta ciidanka qalabka sida iyo Dhageysiga tallooyinka wax ku oolka ah ee Bulshada rayidka.
Sidoo kale, Wuxuu Ra’iisul Wasaaraha safaro shaqo oo 11 cisho qaatay ku tagay Puntland iyo Galmudug, kaas oo ku qotomay arrimaha doorashooyinka, iskaashiga Dowladda Federaalka Soomaaliya iyo Dowlad-goboleedyada iyo u kuurgalidda nolosha bulshada.
Madaxweyne Farmaajo oo la tashiyo badan ka sameeyay ayaa 17-ka bishii September sanadkii tagay ee 2020-ka, wuxuu xeer Madaxweyne xilka Ra’iisul Wasaare Xukuumadda Federaallka ugu magacaabay Mudane Maxamed Xuseen Rooble, isaga oo ku soo xushay “Aqoonta, waayo aragnimada iyo kartida uu u leeyahay inuu sii ambaqaado dadaallada dowlad-dhiska iyo horumarinta qorsheyaasha Qaranka”.
