Ra’iisul Wasaaraha Xukuumadda Federaalka Soomaaliya mudane Maxamed Xuseen Rooble ayaa shacabka Soomaaliyeed iyo bahda Booliska uga tacsiyadeeyay geerida ku timid Allaha u naxariisto Jeneraal Cabdi Maxamed Samatar (Cabdi dheere).
“Waxaan qoyskiisa, asxaabtiisii, bahda booliska iyo guud ahaan Shacabka Soomaaliyeed uga tacsiyeynayaa geerida Allaha u naxariistee General Cabdi Maxamed Samatar (Cabdidheere)” ayuu yiri Ra’iisul Wasaare Rooble.
Jeneraal Cabdi Dheere ayaa muddo dheer si nafhurnimo leh Qaranka ugu soo adeegay, waxaana si gaar ah loogu xusuusan doonaa in uu ahaa sarkaalkii badbaadiyay dhismaha iyo Keydka Wasaaradda Arrimaha Dibadda ee dalka burburkii ka dib.
Allaha u naxariistee marxuumku waxa uu sabab u ahaa in uu badbaado dhaxal mug weyn oo dalkeennu lahaa. Waxaan Eebbe uga baryayaa in uu Jannadii Firdows ka waraabiyo ehelkiisii iyo Ummadda Soomaaliyeedna uu samir iyo iimaan ka siiyo.
