Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre ayaa soo xiray maalinta koowaad ee Aqoon is-weydaarsiga Hannaanka Jiheynta Dowladnimada Casriga ah ee Soomaaliya oo uu maanta furay Madaxweynaha Jamhuuriyadda Federaalka Soomaaliya Mudane Xasan Sheekh Maxamuud.
Ra’iisul Wasaaraha ayaa tilmaamay in la joogo xilligii la cusbooneysiin lahaa qaabka shaqo iyo hannaanka fulinta adeegyada dowladda, maadama ay ku saleysan yihiin duruufihii iyo agabkii burburka ka hor.
Ra’iisul Wasaaraha ayaa soo bandhigay qorsheyaasha horutabinta u leh dowladnimada Soomaaliya oo ay ugu horreyso sugidda amniga iyo dabargoynta argagixisada,maalgashiga, shaqo abuurka, xasilloonida siyaasadda, tiknaloojiyeynta shaqada Hay’adaha dowladda iyo kobcinta dhaqaalaha. Waxaana uu ku ammaanay Golaha Wasiirrada sida ay u xaqiijiyeen qorshaha sanadlaha ahaa ee Xukuumadda DanQaran 2023.
“Waxaan maanta halkaan u fadhinaa waa isbeddel in la helo, si loo xaqiijiyo isbeddelkaas waa in uu anaga naga bilowdaa oo natiijada isbeddelku ay idinka muuqataa”. Ayuu yiri Ra’iisul Wasaaraha oo la hadlayey xubnaha Golaha Wasiirrada.
Ra’iisul Wasaare Xamsa Cabdi Barre ayaa xusay muhiimadda ay u leedahay Soomaaliya in ay ka dheegtaan walaalahooda reer Malaysiya hannaanka dowladnimada casriga ah, casharna ka bartaan jidka ay jeexeen iyo caqabadihii la gudboonaaday inta ay geeddigaas ku jireen.
Aqoon is-weydaarsiga Hannaanka Jiheynta Dowladnimada Casriga ah ee Soomaaliya oo soconaysa muddo labo maalmood ah, ayaa waxaa qeyb ka ah dhammaan xubnaha Golaha Wasiirrada, khubaro caalami ah iyo Madax aqoon durugsan u leh horumarinta iyo casriyeynta dowladaha.
