Ra’iisul wasaaraha Xukuumadda Federaalka ah ee Soomaaliya Mudane Cumar Cabdirashiid Cali Sharma’arke iyo wafdi uu hogaaminayay oo dalka Belgium uga qeyb galay shir lacago loogu yaboohayay Qaxootiga Soomaaliyeed ee Kenya degan, isla markaana dib dalka ugu soo laabtay ayaa tilmaamay in shirka uu ku soo idlaaday guul, qaxootigana looguy yaboohay boqol milyan oo doolar, si dib loogu soo celiyo dalkooda.
Ra’iisul Wasaare Cumar Cabdirashiid oo wareysi gaar ah siiyay Warbaahinta Qaranka, isaga oo ku sugan garoonka diyaaradaha Aadan Cadde ee magaalada Muqdisho ayaa xusay in lacagta boqolka milyan ay qeyb ka tahay shan boqol oo milyan oo loogu talagalay in muddo afar sano ah lagu soo uruurriyo, si qaxootiga ku sugan xeryaha dhadhaab dalkooda loogu soo celin lahaa iyaga oo nabdoon.
Mudane Cumar Cabdirashiid Cali Sharma’arke ayaa hoosta ka xariiqay in sanad iyo bar ka hor ay dowladaha Soomaaliya, Kenya iyo Hay’adda Qaramada Midoobay u qaabilsan Qaxootiga ee UNCHR ay wada saxiixdeen heshiis saddex geesood ah, kaasi oo saabsanaa in qaxootiga doonaya in dalkooda ay ku soo laabtaan laga caawiyo wixii ay ku soo laaban lahaayeen, isagoo intaa ku daray in dowladdu ay diyaarineyso meelihii qaxootiga soo laabanaya la dajin lahaa.
