Andrei Kelin oo ah Safiirka Ruushka u fadhiya Britain ayaa sheegay in aysan suurta gal ahayn in dalkiisa uu adeegsan doono hubka Nukliyeerka ee ‘Taatikada ah’ xilli uu socdo dagaalka Ukraine.
Mr. Andrei Kelin ayaa hoosta ka xariiqay in marka loo eego qawaaniinta u yaalla militariga Ruushka, hubkan oo kale aan loo isticmaali karin iskahorimaadyadan noocan oo kale ah.
Dowladda Ruushku waxay leedahay sharci aad u adag oo qeexaya isticmaalka hubkan, ayuu yiri, isagoo intaa ku daray in hubkan la adeegsan karo oo kaliya ah marka halis la geliyo jiritaanka dawladda.
Madaxweynaha Ruuska Vladimir Putin ayaa heegan sare galiyay ciidamadiisa nukliyeerka dabayaaqadii bishii Febraayo ka dib duullaankii uu ku qaaday Ukraine, waxaa arrintaas loo arkay digniin.
