Muqdisho, February 11, 2015..Ra’iisul Wasaaraha Xukuumada Federaalka Soomaaliya Mudane Cumar C/rashiid Cali Sharmaarke, ayaa ku tilmamay dagaalada ka dhacay degmada Guriceel ee gobolka Galgaduud kuwa nasiib daro ah, islamarkaan ay fursad siin karaan kooxaha Al-shabaab mar kale in ay is abaabulaan, kana faa’iideystaan dagaalada micno darrada ah.
Ra’iisul Wasaaraha ayaa cambaareyn dusha uga tuuray kooxaha caadaystay in shacabka dhaxdiisa ku dhex dagaalamaan, iyadoo xiligaan shacabka Soomaaliyeed iyo dowladuba heegan loogu jiro sidii kooxaha nabad diidka ah looga sifayn lahaa goobaha kooban ee gacanta ay ku hayaan.
“Waan ka xunahay dagaalada micno la’aanta ah ee ka socda degmada Guriceel, xukuumaddu waxay ugu baaqaysaa dhinacyada dagaalku u dhexeeyo in si shuruud la’aan ah dagaalka ku joojiyaan” ayuu yiri Ra’iisul Wasaaruhu.
“Waxaan mar labaad ku baaqayaa in la joojiyo dagaalada ay ku dhimanayaan muwaadiniinta Soomaaliyeed , Waxaana xasuusinayaa dhinacyada dirirtu ka dhaxayso in Soomaaliya ay maanta mareyso marxalad cusub oo ku saleysan nabad iyo wadatashi, taas oo looga soo gudbay xiligii Colaadaha, ayna hiigsaneyso mustaqbal wanaagsan iyo horumar”.
Ra’iisul Wasaaraha ayaa sheegay in Xukuumaddu baaritaan ku samayn doonto cidii ka danbeysay dagaalka lagulana xisaabtami doono cid waliba oo dagaalkaas lug ku yeelata.
—Dhammaad—-
