Safaaradda Soomaaliya ee dalka Talyaaniga ayaa hambalyo ku aaddan xuska sanadguurada aasaaska ciidanka xoogga dalka u dirtay dhammaan saraakiisha iyo ciidamada XDS.
Danjiraha dowladda Soomaaliya u fadhiya Talyaaniga Janaraal Muuse Xasan Cabdulle, oo maanta war qoraal ah ka soo saaray xarunta safaaradda ee magaalada Rooma, ayaa waxaa uu ugu horeyn ugu hambalyeeyay ciidamada iyo saraakiisha Xoogga dalka Soomaaliyeed debaaldegga maalinta la aasaasay ciidanka xoogga.
“Aad ayaan ugu faraxsanahay inaan maanta anagoo joona xarunta safaaradda la qeybsano faraxadda iyo damaashaadka Saraakiisha,Saraakiil xigeennada,Alifleyda,dableyda iyo xaasaskooda waxaan leeyahay hambalyo hambalyo”.
“Sidoo kale waxaan anigoo ku hadlaya magaceyga iyo kan dhammaan howlwadeennada safaaradda amaan uga jeedinayaa halkaan dedaalka iyo horumarada ay ciidanka xoogga dalka qeybahooda kala duwan ka sameeyeen howlgallada ka dhanka ah kooxda argagixisada ah ee Al-shabab ee diiddan jiritaanka iyo nabadgelyada ummadda Soomaaliyeed,” ayuu yiri danjire Muuse.
Danjire Janaraal Muuse ayaa ugu dambeyn ugu baaqay madaxda sare ee dowladda,wasaaradda gaashaandhigga iyo taliska ciidanka XDS inay il gaar ah ku hayaan qoysaska geesiyaashii naftooda u huray xoreynta dalka iyo la dagaalanka maleeshiyaadka Al-shabab oo haatan laga saaray qeybo farabadan oo kamid ah dalka.
Ciidanka xoogga dalka Soomaaliyeed ayaa la aasaasay 12kii April sanadkii 1960kii iyagoo door firfircoon oo lama iloobaan ah ka qaaatay difaacidda dhulka,berriga,badda,cirka , iyo badbaadinta danaha iyo midnimada qaranka Soomaaliyeed.
